鉛水風波蔓延至學校，教育局局長吳克儉（吳得掂）早前竟拒為學校全面驗水，被各界炮轟，雖然最後有上司幫手補鑊，承諾先為幼稚園驗水，但吳得掂並無因此而甩難。尋日香港大學公布最新嘅特首及問責司局長民望調查顯示，吳得掂嘅支持度下跌九個百分點至負三十六個百分點，係所有局長之中最低分。而律政司司長袁國強評分亦下跌，跌零點八分至四十六點六分。
十二名問責局長方面，新官上任的公務員事務局局長張雲正及民政事務局局長劉江華支持度都麻麻哋，雖然張雲正有十五個百分點支持，但認知率只有百分之廿九，被評為表現不彰。劉江華、發展局局長陳茂波同吳得掂嘅民望都出現負值，分別為負廿二、三十三及三十六個百分點，而吳得掂及陳茂波同屬「表現失敗」。
吳得掂唔單止個人表現失敗，喺佢管理之下，香港各大專院校喺QS世界大學排名都「唔係好掂」，好似香港大學就下跌兩位至三十位。吳得掂尋日竟然話，環球大學排名上有好多研究，而研究有唔同標準，頭七十五間大學中，有四間係香港嘅大學，表示香港喺學術地位上相當好。現時大學學術成就已經響起警號，佢都依然闊佬懶理，到四間大學都跌出頭七十五名時佢就真係「唔得掂」喇！