政情：宇人爭掌內會 後果自負
立法會議員張宇人（Tommy）日前表明有意角逐內務委員會主席一職，挑戰現時擔任主席嘅工業界議員梁君彥（Andrew），Tommy獲所屬嘅自由黨力撐，擺明與建制派對着幹，令建制派不少人都大感不滿。據悉，建制派中人已經對呢場「內戰」決不相讓，如果Tommy真係拉攏泛民主派支持，就會名正言順將自由黨逐出建制派外，實行全面封殺，到時Tommy以至自由黨就真係玩出火喇！
有泛民開腔力撐
Tommy日前聲稱想幫輕吓Andrew，所以有意角逐內委會主席一職，又批評建制派唔應該霸住各委員會正副主席位。而自由黨中人亦配合支持Tommy爭位，批評Andrew之前開會同泛民關係唔好，然後大讚Tommy有能力、又有興趣，所以都會支持佢，擺明為爭奪內委會主席寶座造勢。Tommy亦表明會游說新民黨、經民聯、甚至泛民黨派及獨立議員支持，而泛民當中已經有人表明會支持Tommy。
不過，建制派中人自然認為Tommy添煩添亂、對自己人打自己人感到不滿，諗過度過之後就決定，如果Tommy執意爭做內委會主席，佢哋亦唔會退讓，皆因建制派如果團結、乖乖哋坐定定投票，就算泛民與個別獨立議員支持Tommy，Tommy亦唔夠票當選，但如果Tommy真係夠票當選，自由黨通敵就證據確鑿，建制派就可以名正言順將該黨踢出派外，以後建制派開會都唔使理會自由黨，到時該黨真係唔知點收科。
陳健波財會坐正
另外，Tommy無意再做財委會主席，而之前任財委會主席主持新界東北發展計劃撥款申請會議而搞到一鑊泡嘅金融界議員吳亮星（星爺），尋日亦話唔會按原本協調出任新一年度嘅財委會主席。星爺解釋係因為「拉布」情況嚴重，覺得好難有效主持會議。不過，就算Tommy同星爺唔做財委會主席，建制派都唔使愁，因為已經協調由現時財委會副主席、保險界議員陳健波接任。至於泛民會派邊個出選財委會及內委會主席，就要再作討論。