中環出更：港大風暴不絕 鄧鉅明照泵水
香港大學一直獲得唔少社會名人捐助，尋日港大就向六位對港大同社會有貢獻嘅傑出人士頒授名譽大學院士名銜，太子珠寶鐘錶主席鄧鉅明（Jimmy）就係其中之一。雖然港大近期因為副校長委任一事鬧出連串風波，而港大亦喺世界大學排名榜中排名下跌，但Jimmy就大派定心丸，話唔會影響佢對港大嘅捐助喎。對於港大排名下跌，校長馬斐森就死撐係因為評分方法變咗喎，乜真係咁簡單咩？
港大向Jimmy、香港醫學專科學院主席李國棟及資深大律師陳景生等共六人頒授名譽大學院士名銜。對於港大發生秘密捐款、副校長任命等連串風波，Jimmy就話政治嘅嘢好難搞，而且仲絕對會影響港大喺世界院校中嘅排名。不過，佢明白大家一定會有唔同意見，就算百分之九十九嘅聲音一樣，百分之一嘅人有唔同聲音，都係要諗辦法處理，但佢唔會因為百分之一人嘅行為而影響佢喺教育嘅貢獻。
排名跌 馬斐森：計法改變
國際高等教育及人力資源研究機構日前公布咗今年世界大學排名榜，港大就連跌兩位至第卅位，被香港科技大學反超前。馬斐森就話係同評分機構評分方法改變有關，但都會認真看待有關機構嘅結論及作出相應行動，但就強調制訂大學政策並唔係建基於排名變動嘅。
港大校務委員會主席梁智鴻（金刀梁）都有出席頒授典禮，對於近日有指校委會將會調查有委員洩漏會議內容嘅事件，金刀梁就話，任何機構討論重要議程時都需要保密。至於係咪要徹查，佢就話校委會做嘅嘢係保密喎。