「冚家剷泥齊種樹，汝家池塘多鮫魚。魚肥果熟嫲撚飯，你老母兮親下廚。」老朽曾在公共交通工具學星爺在《唐伯虎點秋香》咁，吟誦鬼才霑叔呢首有味廣東打油詩，如今想起才知驚！
係咁嘅，日前睇了本報「探射燈」，提醒市民在公眾地方講粗口，有機會觸犯《公安條例》嘅《公眾地方內擾亂秩序行為》條例，最高刑罰為罰款五千元及監禁一年。
嘩！有冇韭菜啊！佔領中環持續七十九日，黃毛小子狂呼口號衝擊立法會大樓都係被「溫柔執法」預約拘捕，一眾知法犯法嘅法學教授、幕後黑手如淫賤黎都冇事，律政司尋且多次「甩轆」，放生不少違法人士，如果老朽因「魚肥果熟嫲撚飯」而被檢控，條氣就點都唔順㗎啦！不過是吟吓打油詩，紓緩吓生活壓力啫，咁都犯法？
香港法治崩壞已是不爭嘅事實，難怪寸嘴天主教香港教區前主教陳日君得了便宜還賣乖，公然宣稱自己積極參與佔領行動，至今依然逍遙法外而大感「慚愧」；所以話，老朽若然因吟幾句有味廣東打油詩而觸犯所謂「公眾地方講粗口」，咁就真係無厘頭，屙奶油！
其實，呢啲咁擾民又過時嘅條例，除了法律未有粗口定義，執法更容易有雙重標準，人家「媽媽聲」，對方不以為忤，反而笑口噬噬覺得親切自然，你卻話又要罰又要鎖，豈有此理？完全係戇居執法。
反之，真正要維護法治核心價值嘅，好似貪曾、淫賤黎、寸嘴主教、公然鼓吹違法佔中教授之流，卻一個一個放生，對比講吓「粗口」，無疑係閒過立秋啦！再講啊，法律界人士指出，若然在公眾地方講國際粗口，現場無人識聽，便有機會不被檢控。因聽唔明而免拉，又點計先？今日香港之所以沉淪，你懂的！