探射燈：卡通燈籠侵權DIY玩家刑責
潮流興復古，賣相可愛的卡通人物紙燈籠，熱爆今個中秋節。近日多個手作教室亦開班教授自製卡通人物紙紮燈籠，一個個為人熟悉的卡通人物，例如迷你兵團及梳乎蛋等，只需數堂時間，便可完成，並備有現貨供選購。深水埗多間店舖亦售賣各款影射卡通人物的ＤＩＹ紙燈籠，有店主辯稱不知道所售貨品有影射成分，只當一般款式的動物燈籠出售。法律界人士則指，DIY翻版燈籠或會干犯《版權條例》或《商品說明條例》，乃刑事罪行，不但會罰款，更會留有案底及入獄。立法會議員批評，海關應加大力度巡查，不應待舉報才行動。
「你攞張圖嚟，任何卡通人物都可以整到（燈籠），我教你整又得，買現貨都可以。」臨近中秋節，不少家長都會為小孩購買各款燈籠，歡度佳節。在牛頭角一間手作教室，最近便教授自製卡通人物紙紮燈籠，包括熱爆的迪士尼一系列「Tsum Tsum」公仔、迷你兵團、梳乎蛋、「Line」公仔等。記者佯裝顧客向該店查詢，指是否只需在卡通人物的官方網頁下載有關圖片，便可教授紮作同款燈籠。該店負責人鄭先生說：「只要你想整，一定整得到，你喺網頁搵張心水嘅卡通人物圖畫，印出嚟我就教到你。」
導師稱只教整 唔理版權
當記者指欲自製米奇老鼠的紙紮燈籠，是否需要攜同圖片前往，鄭笑說：「唔使帶嚟啦，我呢度都有整好嘅現貨，可以到時跟住整。」由鄭教授的中秋燈籠紮作班，每堂學費一百八十元，時間為兩小時，每個紙紮燈籠約需時兩至三堂完成，學生可自選不同類型的卡通人物，鄭更聲稱有多間公司、團體及個人查詢有關興趣班。
現場所見，當時有六名少女正在仔細望着卡通人物的圖片，學習紮作燈籠，包括史諾比、米奇老鼠、大眼仔等。記者問及可否來圖訂製時，鄭卻表示：「如果我整就貴好多，最平一個要六百八十蚊，有手有腳嘅就要八百幾蚊。」他指，現時中秋燈籠紮作班差不多額滿，九月中將會截單。
「我只係教整燈籠，唔會理會版權嘅嘢。」鄭強調，他只會提及製作「卡通人物」的燈籠，「唔會講明整乜嘢公仔。」他更指，坊間有不少工作坊也教授製作卡通人物的馬卡龍，「佢哋一整就整幾十個，如果真係有問題，一早拉晒佢哋啦。」
賣貨店舖 避提是否正版
除了卡通人物紙紮燈籠班外，深水埗多間玩具店舖亦出售各款影射卡通人物的紙燈籠，「呢隻係貓，嗰隻就係狼同青蛙，你話佢係Hello Kitty，我就話係貓囉。」記者佯裝顧客欲購買燈籠，當提到「Hello Kitty」、「灰太狼」及「多啦Ａ夢」等卡通人物時，其中一間店舖女店主即表示，其售賣的DIY公仔紙燈籠並非記者所言的卡通人物。記者問及其中一款燈籠是否為卡通人物灰太狼時，她只回應：「我唔係叫佢做灰太狼，叫佢做狼咋。」
當提及該店所售貨品是否正貨，女店主初時迴避，其後細聲表示「點會係真」，又指「太似嗰啲都唔敢賣啦。」記者隨後到另一間店舖查詢同類貨品是否有貨時，店員直指：「得迷你兵團有貨咋，其他要訂。」但問及是否正版貨時，對方即以忙碌為由，迴避問題。而另一間店舖女東主坦言，「叮噹（多啦Ａ夢）晏啲就返貨，但我唔知咩叫正唔正版喎。」
違版權例 可判罰款坐監
執業大律師陸偉雄表示，進行翻版活動會干犯《版權條例》或《商品說明條例》，乃刑事罪行，「如果跟足晒嚟翻版，好似倒模咁，會觸犯《版權條例》；而比較過跟正版有偏差，將違反《商品說明條例》。」他亦指，導師教授DIY製作卡通人物燈籠，是教唆他人進行侵權行為，而製作者就是協助他完成，但法庭會就每個案件作出判決，「拎出去賣就好大機會係侵權，唔單止係罰款，仲會留案底同坐監。」
圖／文：專案組