公屋食水含鉛風波愈演愈烈，不論建制、泛民黨派面對年底區議會選舉嘅壓力，都積極抽驗食水，順便抽水。不過「堅離地」嘅公民黨（公民袋）就被指慢幾怕，遲遲未有派人跟進事件，但點知一出手就好騎呢，竟然派出立法會議員郭家麒去同台北市長柯文哲（柯P）見面，討論飲用水問題，真係唔知同香港鉛水風波有乜關係，難怪佢否認為鉛水事件補鑊嘞，只係就公共場所設水機取經。
郭家麒由今日起一連三日訪問台北市同新北市，將會先後同柯P和新北市副市長侯友宜會面。
佢承認國語唔好，只係練咗「柯市長，你好」，其他時間估計都用英文溝通。佢話同柯P都係外科醫生，又同樣喺美國讀書，相信有好多話題。今次佢忽然過台灣講水，主要因為佢會喺十月立法會復會後以私人草案方式提出有關乾淨飲用水嘅法案，仲訂製咗三千個膠水樽派畀市民，鼓勵市民多飲自備水。