政情：卿姐失言 政壇友好爭做「傻仔」
立法會議員劉慧卿（卿姐）周日出席論壇時一句「傻仔」回應主持蘇敬恆，就惹來政圈一片抽水潮，個個排住隊認係卿姐口中嘅「傻仔」。卿姐尋日講番件事，佢話唔記得幾時開始講呢句口頭禪，但講咗咁耐，大家都冇乜意見，可能今次喺電視機面前講，先令網民有所反應。至於將來會否收番呢句口頭禪，卿姐話人哋唔鍾意就唔講喎。
黨員護航稱非侮辱
咁有邊啲人被卿姐叫過「傻仔」呢？卿姐話其中一個係佢讀倫敦政治經濟學院嘅師弟、離島區議員周浩鼎；而卿姐一班黨友事後陸續認頭爭住做「傻仔」。黨友尹兆堅話，卿姐都試過叫佢「傻仔」，又試過開會時當住咁多人面前話「唔係呀嘛，傻豬」、「離晒譜」呢啲口頭禪，但佢認為講呢啲說話係睇語境，並非侮辱對方。
會計界議員梁繼昌（Kenneth）都話，卿姐成日都叫佢同資訊科技界議員莫乃光及法律界議員郭榮鏗做「細佬」或「衰仔」，尤其做議員頭一兩年，佢哋唔記得熄座枱燈就走人。Kenneth都話呢件事抵鬧，因為浪漫能源，而被卿姐鬧完，事後佢哋都會乖乖哋熄燈，咁就唔使卿姐勞氣喇。