行政會議成員、立法會議員葉劉淑儀自從農曆年初在車公廟被舞麒麟撞飛後，一直是非纏身，而香港大學民意研究計劃最新公布嘅行會成員民望評分顯示，葉劉嘅支持度都被撞跌埋，到今日乃「肥佬」，仲未升至半年前嘅水平，果然黑氣未除。莫非真係好似堪輿學家麥玲玲所講，葉劉「全年黑過鬼」？
港大民意研究計劃於上月底至本月初進行兩階段調查，每階段隨機抽樣超過一千個樣本。受訪者需要無提示下講出五位行會成員，葉劉係最多人講得出嘅一位，高踞榜首，而其餘十三位成員只有個位數，身兼鄉議局副主席嘅張學明及新任行會成員楊偉雄仲要捧蛋添。
雖然葉劉多人識，但得到嘅支持其實唔多。佢農曆新年被麒麟撞飛後，民望創新低，即使今次有所微升，都仲未合格！雖然葉劉支持度肥佬，仍無阻佢入選「五大議員」，排名第二。入選「五大議員」除咗要高支持率，先決條件要多人識。至於身兼港大校委會成員李國章，亦似乎未受副校長風波影響，躋身「五大議員」，而「五大議員」目前只得召集人林煥光一人合格，順理成章排名榜首。
卓妮