中環出更：幫維港泳打氣梁紀昌被「拉落水」
維港泳將於下月舉行，主辦機構近日就邀請咗唔同界別人士拍攝一系列水底照為嚟緊參賽嘅泳兒打氣，原來除了現年九十一歲嘅詠春拳宗師葉問之子葉準及香港首位職業西洋拳拳擊手「神奇小子」曹星如外，剛退休的香港鮮魚行學校前校長梁紀昌及該校學生都被拉落水。卓妮見班小學生均穿上泳衣上場，唯獨梁紀昌着恤衫打領呔，與學生相映成趣。
當日梁紀昌聯同三位鮮魚行學校學生一齊參與水中拍攝，佢話自己於一九七八年渡海泳停辦前曾參與過賽事，今次有份參與拍攝水底照，笑言好似海龍王，有啲學生好似蝦兵蟹將咁在旁陪佢玩；又指水中拍攝最難是「小朋友成日浮來浮去，好難控制」，但表示過程十分開心有趣。
不諳水性 曹星如感新鮮
葉準及曹星如亦有參與拍照，葉準師父透露，佢已經有大約三、四年冇游泳，今次係首次於水中拍攝，當日佢在水中大耍木人樁法，現場水花四濺，玩得不亦樂乎！而早前獲得職業生涯中十八連勝的曹星如原來不懂游泳，首次在水中不斷出拳的他話感覺相當新鮮，雖然要在水中閉氣感到有點辛苦，但仍十分享受拍攝過程。
由打機達人搖身一變成為廣告天王嘅「達哥」林慧韡、香港舞蹈團藝術總監楊雲濤等亦被拉落水。對於第一次挑戰水底舞台，楊雲濤指多年來跳舞都是站在舞台上，而在水底舞台站也站不穩，感覺特別奇妙。
卓妮