本報獨家踢爆，香港大學牙醫學院懷疑佔用公帑補貼自資課程，實行化公為私，包括菲臘牙科醫院嘅護士及儀器，每年估計最少涉款數百萬元，引起社會嘩然。校方仲死撐自資課程嘅成本已按港大指引回收喎，你信唔信吖！
件事係咁嘅，菲臘牙科醫院係港大牙醫學院嘅教學醫院，由食衞局撥款營運，一年資助額多達一億四千幾萬元。呢啲資源本應用作培訓教資會資助嘅牙醫學士課程，點知因為港大牙醫學院開設嘅自資碩士及高級文憑課程收生不斷增加，無形中佔用唔少資助課程嘅資源。舉個例吖，以前一名實習牙科護士輔助三至四名實習牙科醫生，依家因為碩士學生增加，變成一名牙科護士輔助八至十名醫生。
堂堂一間牙醫學科全球排名第二嘅學府，竟然淪為金錢掛帥嘅學店，巧立名目賺錢，最後由納稅人埋單，簡直令人難以置信。港大牙醫學院否認佔用公帑，聲稱自資課程嘅成本已回收，事實係咪咁呢？當然唔係喇，正如消息人士質疑，如果收回成本，點解唔話畀人知筆錢喺邊度？
嗱，醜聞曝光後，食衞局局長高永文被迫出嚟補鑊，聲稱非常關注菲臘牙科醫院用公帑補貼港大牙醫學院嘅自資課程，將會跟進同查核喎。佢仲話人力資源嘅成本亦要釐清及核數，若證實佔用公帑資助，就要歸還政府咁話。
講就係咁講嘞，結果係點仲要睇過至知，事關港產官僚一向敷衍塞責，今次會唔會又係不了了之，實在好難唔令人懷疑咯。其實，港大牙醫學院同菲臘牙科醫院帳目混亂早有前科，幾年前曾經畀審計署炮轟過，點知仲係死性不改，問你服未！
話時話，自資課程之所以亂象叢生，醜聞多多，固然因為各院校唯利是圖，而港府好大喜功亦難辭其咎。當年為咗將年輕人留喺校園，一來提升所謂大專入讀率，二來降低失業率，任由各間院校開設大量自資課程，最弊係未有做好規劃配套，加上不監不管，搞到課程質素泥沙俱下，良莠不齊，學位嘅認受性低，學生浪費大量時間及金錢，畢業後唔止得物無所用，反而孭咗一身債，呢啲唔係作育英才，直頭係誤人子弟喇。
計功夫茶話齋，教育係年輕人自我增值嘅最好選擇，亦係向上流動嘅最佳出路，各院校應該有番啲社會責任，唔好一味向錢看。港大牙醫學院帳目唔清唔楚，唔使問阿貴，好明顯就係本身管理出咗問題，以及港府監管不力，希望當局唔好再側側膊兩頭望，唔單止要成立獨立調查委員會查清查楚，而且要追究責任，睇吓有冇需要開鍘侍候！