有人話現今嘅內地嫩模，雖然有樣有身材嘅唔少，但好多都係走青春路線，甚少見到有女人味嘅模特兒。不過小弟可以好肯定咁話，呢種睇法係錯嘅，皆因佢哋忽略咗一位不但年紀輕輕，女人味同樣令人迷醉不已嘅索模，佢就係萬千寵愛在一身嘅鄭瑞熙。
今年23歲，英文名Miley，別名米瑞嘅哈爾濱索模鄭瑞熙，承襲東北人血統，擁有白皙嬌膚，配合埋玲瓏浮凸嘅身材，天生一副美人胚子。喺佢仍就讀北京電影學院時，被模特兒公司發掘，參加全國網絡美女選美大賽，從此展開模特兒生涯。憑住亮麗嘅外形，好快已成為一位炙手可熱嘅平面模特兒，先後喺多本時裝、美容及男性雜誌上亮相，又喺多個時裝騷、電子產品展、香水產品發布會等，以模特兒身份登場。如果覺得咁樣仲未能證明佢模特兒嘅實力，及外形有幾咁迷人嘅話，其實自佢出道以嚟，先後喺多個模特兒比賽及選美會中獲得卓越嘅成績，當中包括中國時尚文化大獎十佳中國模特兒、品牌超模大賽總決賽冠軍、中國職業模特選拔大賽最佳形象獎等，實力絕對有目共睹。
不過瑞熙最惹人妒忌嘅地方，唔止外形超索咁少，事關佢喺音樂上亦有相當造詣，曾於第八屆中新國際音樂大賽中獲得冠軍。須知道畢業於著名電影學院，並喺音樂上有相當實力嘅佢，又點會規限自己發展嘅空間呢？故此佢上年同一間影視製作公司簽約，正式進軍影視界，務求將自己嘅實力盡情發揮。佢之所以有咁嘅決定，除咗源於對自己實力嘅自信外，亦因為相對其他同齡索女，佢擁有一份女人味。喺好多人心目中，總以為女人味係有番咁上下年紀嘅女人先至可以散發出嚟。不過呢種睇法，完全套用唔到喺瑞熙嘅身上，皆因年紀輕輕嘅佢，不但有種令男士為之神搖目眩嘅魅力，最重要係不論佢以時裝造型示人，抑或換上古裝扮相，都唔能夠掩蓋到佢嗰種得天獨厚嘅女性氣質，故此佢未來嘅發展確實值得期待。
鄭瑞熙作為一位人氣極高又極具魅力嘅平面模特兒，同時又係一位既精於音樂，又經過演藝訓練嘅索女。如此內外兼備嘅美女，究竟私底下又係點嘅呢？想知嘅話，梗係要去佢嘅個人微博，加深對佢嘅認識啦！
網址：www.weibo.com/u/5174617164
出生地：哈爾濱
身 高：167cm
三 圍：35、24、36
撰文：魂