內地有名人在博客貼文，說九月三日因抗日戰爭勝利七十周年紀念，全中國放假三天，日本國內的各大商家總動員，做好了迎接大批中國遊客赴日本度假和暴買日貨的準備。名人說他對日本不反感，買日本貨也沒問題，但這一次是抗日戰爭紀念，所以這三天還是不要去日本買東西吧！老朽相信其呼籲只會落得黃牛鑽老鼠洞——行不通！
事實勝於呼籲，自今年六月起，日本已成為中國遊客出境遊的第一選擇（在此前是南韓），上半年赴日的內地遊客達二百一十萬人次。鬼咩！香港自「反水客」行動，內地赴港人數大幅下滑，零售業、飲食業嗌晒救命，而南韓也因受新沙士疫情而遊客狂減，你話啲人唔去日本又有乜好揀呢？
日本安倍對中國態度衰衰，之不過，政府及民間對內地客則笑臉迎人。嗱！除了免稅品範圍擴大，簽證放寬，加上日圓貶值，內地客唔湧去「暴買」就有鬼咯！
講真，中國人就係人多好辦事，大媽買金買到美國華爾街都震驚，其「清倉」能力令飽受經濟低迷嘅日本商家看傻了眼。不是嗎？國人將數以萬計嘅眼藥水、菜刀、電飯煲、馬桶蓋「人肉」回國，還有人怕咗內地嘅有毒「鎘米」，專程赴日本購買大米，據云因數量龐大，有內地客甚至要租賃小型集裝箱託運！
日本見到內地客嘅掃貨能力，犀利過某牌子嘅殺曱甴藥，商家怎不笑逐顏開，在各大車站打出大紅綵帶：熱烈歡迎中國遊客！
中國遊客更是日本公司嘅創奇者。話說日本有家電器連鎖店樂購仕，十四年來首次盈利，其股價從二○一二年低點上漲百分之一千四百，你說內地遊客成了日本企業的大救星也不為過！三日不買日貨，第四日掃光，日本商家笑了！