政情：今日你上鏡：王淑慈挖「港漂浙人」

近年香港各地同鄉會日益活躍，目的無非係想凝聚鄉情，必要時可就重大政治社會事務齊發聲。其中已成立十七年嘅香港浙江省同鄉會聯合會（浙聯會），成功聯繫八十幾個浙籍組織及約三十萬名浙籍居港人士。負責發掘青年會員嘅浙聯會理事兼青委成員王淑慈（Sukey）就話，最近佢哋向「港漂圈」埋手，即係透過旅港內地畢業生組織，希望留住嚟港讀書嘅內地年輕人，為聯會注入新血。Sukey家姐王淑欣（Jocelyn）一直為家族旗下酒店搵唔到人才而頭痛，依家有機會喺「港漂圈」搵人才就啱晒喇！