政情：馮英倫「遲到」賭城度蜜月
唔少人都視度蜜月係結婚嘅其中一項大事，但偏偏從政人士就好難度到蜜月期喇。發展局局長政治助理馮英倫（Allen）已於六月底結婚，但係拖到依家九月頭，先放到半個月假去有賭城之稱嘅美國拉斯維加斯度蜜月。
太太飲得杯落
喺Allen上載到fb嘅相，見馮太Carrie化咗超淡妝，上鏡幾清秀，睇落又幾開心，斷估冇嬲Allen拖咁耐先去度蜜月啩？
Carrie係澳門人，從事紅酒生意，今次去度蜜月，順便試吓啲靚紅酒。Allen喺太太影響之下，都有品酒。咦，咁佢兩公婆酒量咪好好？Allen就話，品酒唔係猛飲，有啲人試完酒，仲會吐番出嚟。睇嚟Allen娶到個識飲嘅太太，應該學到唔少葡萄酒嘅知識。