中環出更：旅業寒冬 零售界諗計救亡
近日股災，加上內地旅客來港人數大減，零售生意最受影響，零售業都要諗計救亡。一向搞開全港購物節的全港各區工商聯會長李鋈麟話，自從反水貨客及趕客行動之後，內地旅客就唔敢再嚟香港，直接去澳門玩，估計少咗成四、五成旅客，唔少仲係嚟自北京、上海等具消費力嘅旅客，加上有自貿區已經賣緊免稅奶粉，令香港吸引力大減。
李鋈麟話：「以前有一車車旅客去買手錶、珠寶或去藥房，依家全部都冇晒！」佢估計整體零售生意少咗約七成，擔心明年農曆新年前，會有倒閉潮，最少一、兩成舖頭會執笠，依家都未知「寒冬」幾時完結。
李鋈麟：港府要多做宣傳
佢認為，政府應該多啲去內地宣傳，會對反水貨客行動嚴厲執法，以及旅遊熱點已經冇晒反水貨行動，令旅客有信心嚟香港玩。
至於裕華國貨董事總經理余鵬春就話，除咗內地客少咗，股災都令旗下生意受影響，好彩受惠於人民幣貶值，依家入貨都平咗，希望過兩、三個月市況會穩定啲。另外，政界一直傳余鵬春有意競逐總商會立法會代表林健鋒個議席，今次佢就大笑話：「到時就知囉，到時就知，如果公布咪即刻計我啲選舉經費。」
做開有機護膚品生意嘅博愛醫院副主席陳李妮（Lily）就比較好彩，佢話做開熟客同港人生意比較多，加上控制成本，得閒又醒啲護膚小貼士畀啲客，所以影響唔大。
陳李妮賣千呎單位賺一倍
Lily仲話，早前想換過間村屋畀媽媽住，咁啱佢早年喺馬鞍山買入嘅一個過千呎單位，有識貨之人唔講價就買咗，足足賺咗一倍，孝順女果然有福喎！
卓妮