有人話，內地乜都有，就係冇道德良心，真係冇講錯o架。呢，又有人製售假藥喇，而且仲係有「急救神丹」之稱嘅安宮牛黃丸添，病人用嚟救命，奸商就用嚟謀財害命，你話有冇道德良心吖。
係咁嘅，南京警方近日破獲一個假藥工場，專門製造假冒北京同仁堂嘅安宮牛黃丸，然後銷往香港、廣東一帶。一粒成本唔使兩個半嘅假冒安宮牛黃丸，經包裝後售價飆升幾百倍到七百幾元。呢間設於廢棄廠房嘅所謂「製劑室」，既冇工商營業執照，亦冇生產藥物許可證，而最令人估唔到嘅係，幕後主謀竟然係香港人，佢提供藥方，喺南京揾人製造，至今已賣咗三百幾萬元假藥。中港奸商拍住上，問你怕未！
好多人都知，安宮牛黃丸係搶救急重病嘅常用中藥，被奉為中風急救神丹。幾年前本港一家電視台女主播喺歐洲遇到火車意外，腦幹一度死亡，外國及港台醫生都束手無策，送到內地治療後竟然奇迹康復，據講藥單中就包括安宮牛黃丸，足證急救神丹名不虛傳。奸商好揀唔揀，偏偏假冒呢種神丹，救命隨時變奪命，同謀殺根本冇分別。
話時話，內地無食不毒，無物不假，今次破獲嘅假安宮牛黃丸只係冰山一角咋。兩個月前之嘛，東莞警方就搗毀另一個疑由中港奸商經營嘅冒牌中成藥集團，檢獲逾百瓶假藥及百幾噸原料，偽冒香港品牌多達六十四種；今年一月，廣州警方亦搗破十二個生產及儲銷假安宮牛黃丸嘅窩點，查獲一萬二千幾粒假藥，涉額高達三千多萬元，拘捕十七名疑犯……奸商泯滅人性，假藥氾濫成災，類似事件可以講係無日無之。
冇法子喇，中國除咗係「世界工廠」，更係「造假王國」，連世衞組織都指中國係全球最大嘅假藥集散地，大家早就見怪不怪咯。之所以搞成咁，根本原因就係道德淪落，人人唯利是圖，加上官商勾結，執法不嚴，想唔七國咁亂都幾難。根據法例，製售假藥話就話最高可以判死刑，但多數只係罰款了事，對奸商毫無阻嚇力，佢哋仲唔有恃無恐咩。所以話，對奸商仁慈，即係對百姓殘忍，國產官僚根本就係助紂為虐。
城門失火，殃及池魚，兩岸頻頻爆發假藥及食品安全危機，香港幾乎次次都中招。嗱，台灣黑糖又驗出含致癌物質，香港會唔會幸免呢？睇怕都幾難咯。兩岸官僚靠唔住，港產官僚本來應該加強把關至係，可惜事實啱啱相反，港府後知後覺，次次都要等到出事至補鑊，港人除咗自求多福之外，仲有咩選擇呢！