冇女優，冇o靚模，冇索女，乜女都冇，咁呢個Sexpo究竟有幾Sexy呢？答案係，假如你純為買新產品嚟爽咁一定失望而回，事關香港亞洲成人博覽，主要為商家提供平台，展示成人娛樂世界潮流，好似你我他仲玩緊嘅機杯，原來Out到冇朋友，想睇騷過癮，都係留待年底12月份喺澳門再嚟過啦！
眨眼就第三年，博覽可以順利開幕，唔開懷大笑都唔使愁容滿面o架！但主辦單位「縱延展業」總監Wilson多年嚟都非常無奈，佢對傳媒話理由得一個：「難搞都要搞！」係o架，香港地話就話思想開放，但一講到話要搞成人博覽，個個都縮晒頭。主辦單位話早喺2008年已申請，真係要過五關斬六將，先可以喺香港會展成功舉辦「性博覽」。但自第一屆「破冰」後，打後每屆都有好多規矩要跟，至少你唔會見到一河之隔澳門咁有女優上台表演，有「陽具畫家」即場畫畫，仲有性感制服索女滿場飛先囉！「講呢啲」就算吧！單係香港成人博覽只限「買手」入場，沒有對公眾開放經已係「死罪」，難怪官方決定重新定位，全面向商貿平台進發。
因此，冇女優、冇o靚模，換嚟係世界各地行家分享會，今屆多達190個參展商比舊年增加一成多，其中新增有丹麥、印度等地區，而主辦單位強調，佢哋內心嗰團火係唔會熄，會好似慾火一樣谷住等一鑊爆出嚟，希望有朝一日，有關方面睇到成人博覽嘅專業同成績，主動畀佢哋放盡嚟玩喎！巴絲無緣參與但唔代表毋須理會噃，理由係2015亞洲成人博覽香港站，絕對係情趣用品潮流指標，細佬喺27號開幕首日率先現場視察，原來你仲玩緊甚麼「名器J杯」當日完全無影，最低檔都講緊電動J杯，仲要係唔多買手吼，今期識玩，一定玩人形公仔！
記得當年有日本參展商首次喺澳門站發布1：1真人矽膠公仔，像真程度連真人都呃埋，可惜十幾萬港紙一個，咁「天價」邊有人捨得J先？經過強國代工廠一直努力不懈，今屆人形公仔已成為場中焦點，現場所見，至少有六間內地參展商「晒冷」，由造工精細度及規格技術都拍得住歐美日廠，無論髮型長短、眼耳口鼻五官，膚色彈性以至身高及骨架，國貨一一滿足到，例如其中一參展商WM Dolls，剛啱喺台北成人博覽搞完就急急腳飛過嚟擺檔，負責人指出矽膠公仔夠個人化，佢好有信心話：「真人做到嘅動作公仔統統做到，反而公仔做到嘅如一字馬、單腳企、拱橋體位，真人就未必做到！」單係「暢快感」都贏晒，難怪按年銷售增幅比J杯仲要強勁啦。
而更筍嘅係，由於多間廠家投入研發，售價已由六位數字，急跌到約莫兩萬港紙就可以度身訂製一個返屋企爽，尺碼仲多到你唔信，由不足一米到「真人版」1.65米都有，視乎用家喜好而定。記者問參展商製作需時多久，竟然有廠商話：「唔係太大更改，即場拎走都仲得！」真係Casual到咁？相反，當年塞爆會場嘅乜乜J杯，今日統統唔見晒。
屋企冇位放，唔想J完仲要成件捧去「沖涼」咁麻煩，咁巴打一定要留意「虛擬實境」性玩具，展覽當日一家叫BKK公司，現場負責人Emily話佢哋嘅技術比歐美日仲要勁，皆因軟硬件都自己開發，絕不會出現格式不兼容或貨品質素問題。當日記者試玩頭戴式顯示器，配埋電動J杯，首次體驗「虛擬實境」四仔，當用家個頭擺動，眼前「人物」同步擺動。負責人仲話，目前係試驗階段，只有動畫版提供，亦可對應坊間色情片，未來會有「真人版」，專為頭戴式顯示器製作，但問到會否同日本AV女優合作定歐美廠家，負責人話一切保密，等年底正式推出市場就知喎！
震棒震蛋、愉虐用品、情趣內衣，當然係成人博覽必備，所以毋須多作介紹，反而「性家電」勢力抬頭，例如皮櫈同時係伸縮震棒等，每件都可掩人耳目，爽呀！
撰文：祖
攝影：昌