政情：金刀梁讚麥國風「不務正業」
精神科護士、前立法會衞生服務界議員麥國風（Michael）即將「登六」，尋晚舉行榮休晚宴筵開廿席，唔少醫學界中人都畀面出席，包括食物及衞生局局長高永文、醫管局前主席梁智鴻（金刀梁）、醫管局行政總裁梁栢賢、醫學會會長史泰祖等，大家都話當年，高永文仲翻Michael舊帳添！
高永文講返當年做醫管局行政總裁時，喺沙士期間畀做緊議員嘅Michael捉咗去「重災區」威爾斯親王醫院，見前線醫護人員，大家食飯除晒口罩，好彩最後冇中招。金刀梁就笑Michael同自己一樣「不務正業」，參與公職及各級選舉，其實都係為咗社會好喎。
麥退休擬再戰區選
Michael就話，退休後打算成立顧問公司，訓練服務性行業嘅公司員工點樣面對客人。當然另一樣嘢，就係積極考慮參與十一月區議會選舉啦，話「喺邊度跌低，就喺邊度起番身」，挑戰灣仔樂活選區現任議員白韻琴及疑似參與人蕭思江。不過，有樣嘢佢控制唔到，就係仲未有孫抱，睇嚟佢嘅三十歲大仔要努力啲喇！