政情：侯志強為鄉揚威 寧棄自由
立法會新東議席補選再引發鄉事派與建制派之間嘅矛盾！過去一直幫其他建制黨派「抬轎」助選的鄉議局，換屆後雄心壯志，希望透過派人出戰明年初舉行嘅新界東補選打響頭炮，但近日有傳被西環勸退。被鄉事派推舉出戰新界東補選的上水鄉事委員會主席侯志強透露，鄉議局曾當面批評西環「大細超」，有心打壓鄉事派，他表明考慮退出自由黨參選，近日仲與鄉紳合購新馬「新界威威」，戰意甚濃。
自比睡獅 「係時候甦醒」
侯志強表示，有關西環勸鄉議局勿出戰新界東補選的傳聞，內容只有八成準確，他大爆當日鄉議局都有出聲，狠批西環「大細超」，唔畀鄉議局派人參選，改為繼續支持其他建制黨派參選人。佢話自己都係愛國愛港人士，「劏個心出嚟都係紅色」，而鄉事派就好似沉睡百幾年的獅子，「是時候要甦醒，否則就冇用喇！」
侯志強所屬自由黨，曾表明不會派人參加新界東補選，所以侯志強出選唔符合黨嘅立場。被問到會否「光榮引退」，侯志強就話，自己都係時候「告老還鄉」，預計會喺區議會選舉後，即年底至明年初就會考慮退黨，稍後會向自由黨表明退黨意願。他計劃退黨的時間，正正就係新界東補選嘅時候，睇嚟他已下定決心披甲上陣。
合購賽駒 名字有玄機
佢又透露，對於補選一直都密鑼緊鼓，積極做好準備，又打個比喻：「今時今日唔係水到渠成，係要做好預備先，成班兄弟掘靚條渠預備好，有水嚟先接到，最終係咪出選都會交畀鄉議局決定。」至於鄉議局會否有唔同意見呢？侯志強就話，局內對各種事情有唔同意見係好事，但協調工作並非佢負責，而是主席劉業強工作之一。最近他同鄉紳合購新馬，改名為「新界威威」，如果鄉事派最後都是難逃「抬轎」宿命被勸退，咁咪好似幾年前車公靈籤籤文「威人威威不是威」？