鉛水風波爆發逾月，禍源究竟喺邊度，當局仲係矇查查，居民固然人心惶惶，連公屋興建進度都受到影響，隨時連累編配，拖長輪候時間，都咪話唔大鑊。
嗱，由於要等候下月公布嘅幾份鉛水重要報告，包括食水含鉛量專責小組報告、鉛邨承建商提交嘅調查報告及○五至○七年二十七個屋邨驗水結果報告，房委會決定暫緩批出四個房屋項目嘅標書，總共涉及六千二百個單位。話就話僅延遲一個月，影響似乎唔係好大，之不過咁，冇人敢擔保呢幾份報告冇事，如果到時有問題，咁又點算呢？係咪要繼續押後呢？
即係咁，預防勝於治療，房委會暫緩討論建屋工程標書，出發點係無可厚非嘅，遲落成總好過落成後至補救。問題係，公屋供應本來已經嚴重短缺，輪候冊大排長龍，六月底已突破二十八萬宗申請，一般家庭平均輪候時間延長至三點四年，距離三年上樓目標愈來愈遠，依家部分工程仲要延遲，豈不是雪上加霜？正如關注公屋團體話齋，未來數年公屋落成量低於目標，加上鉛水風波，除咗影響工程招標，而且影響驗收程序，好多新公屋可能要推遲入伙，預計輪候冊人數年底將突破三十萬宗，平均等候三點六年。
唔係靠估o架，鉛水風波唔單止發生喺已落成嘅公屋，部分興建中嘅公屋亦中招，好似觀塘安達臣道公屋地盤咁吖，喉管全部要拆卸重鋪，最少都要搞幾個月喇。加上部分房屋工程押後招標，整體供應肯定進一步受影響。再講，萬一涉事承建商有意隱瞞或提交假報告，隨時又要重新招標，最少要拖多半年，呢度阻一阻，嗰度拖一拖，無殼蝸牛除咗望天打卦之外，仲可以做啲乜呢。
講開又講，鉛水風波爆發以來，最少已有十個屋邨中招，而驗出血鉛超標嘅居民亦與日俱增。呢，最新公布嘅驗血報告顯示，喺牛頭角下邨及紅磡邨等二百幾個血液樣本中，有八個兒童樣本含鉛量超標，其中一位一歲幼童超標近倍。仲有吖，深水埗一間小學自行化驗食水，亦發現含鉛量超標三倍，鉛禍無處不在，唔驚就假。
當局係就係動作多多，又提供新供水系統，又督促承建商更換喉管，又為居民驗血，而且成立專責小組調查水禍添，可惜好似盲頭烏蠅咁，根本解決唔到問題。講到底，當局一日未搵到禍源，居民一日未能安心，民怨就一日未能消除。港府都識得講喇，民生無小事吖嘛，依家連飲啖乾淨水都成為奢望，市民又點可能冇怨氣吖！