政情：公民講場：禍水臨門 吳得掂唔急驗

鉛水風波由屋邨擴散至學界，深水埗聖多馬小學一個水樣本被驗出含鉛量超標三倍，但教育局局長吳克儉尋日出席一個活動時就輕描淡寫話，暫時只有一間學校知會教育局有關抽水樣辦超標，而在抽驗六個水辦中，只有一個水辦嘅含鉛量超標，又話當局暫時未考慮為全港學校驗水。記得○三年沙士疫情爆發初期，時任衞生福利及食物局局長楊永強又話社區無肺炎爆發，點知後來疫情一發不可收拾，最終佢要引咎辭職。其實為全港學校驗水有幾難呢？萬一將來多間學校爆出有鉛水，到時吳克儉唔單止叫「吳得掂」，分分鐘仲改名做「吳急驗」，嚴重嘅可能要引咎辭職添！