立法會食物安全及環境衞生事務委員會原定去美國紐約及三藩市考察美食車，但最終只得三人報名，又疑被紐約當地機構冷待，結果因冇人接待而取消紐約行程，點知日前仲取消埋成個考察團添，搞到原本興致勃勃嘅委員會主席張宇人最終都去唔成美國。
據聞今次考察團甩轆係因為議員單仲偕因為冇得去紐約所以退團，最終搞到佢黨友黃碧雲（一舊雲）都唔想去，考察團惟有取消。
我哋尋日就問單仲偕轉軚原因，佢就話考察團原本打算去埋紐約，參觀食物及藥物管理局（FDA）嘅實驗室，睇吓佢哋點樣處理食物安全問題，點知有關方面唔騷佢哋，結果只係剩番三藩市嘅行程。
單仲偕覺得成個團去五日，扣除搭飛機時間，得三日留喺三藩市，無論時間及公帑使用上都好浪費，所以決定唔去。至於早一段時間都有意思隨團嘅漁農界議員何俊賢又唔頂替單仲偕個位，咁惟有告吹。
雖然去唔成美國，但一舊雲已經心思思，打算去德國考察當地食水安全監管事宜，十月復會佢就會向相關委員會提出建議喎。