政情：遭撬樁腳 范國威選情危
立法會議員向來很依靠區議員樁腳支持，但據悉新民主同盟（新同盟）立法會議員范國威在明年立法會選舉或會失去兩名區議員樁腳支持，預料票源必定銳減，選情真係危危乎。一切源於前民主黨（白鴿黨）立法會議員鄭家富（橡筋褲）早前明言有意於明年捲土重來重奪新界東議席，有傳新同盟沙田區議員丘文俊及容溟舟有意過檔幫佢助選，若然佢真係參選，除了搞散新同盟外，預料將與范國威兄弟對戰。
今屆僅「掹車邊」
丘文俊本身喺橡筋褲辦事處做咗四年職員，兩人都算係一拍即合。對於退黨助選，丘文俊話目前會先着眼區議會選舉，「十一月之後，我仲做到樁腳先算啦」。
他又認為，要幫橡筋褲助選未必要退黨，只要配票得宜，橡筋褲同范國威有機會同時當選。至於橡筋褲前助理、新同盟大埔區議員任啟邦就講到明，會先為新同盟參選人助選，認為橡筋褲都有足夠政治魅力，未必要樁腳幫助。
范國威今屆獲橡筋褲力撐，都只係「掹車邊」當選，下屆如果橡筋褲出戰新界東必定會分薄票源，仲要撬走新同盟區議員，范國威好大機會議席不保。
范國威就話，未聽過有黨員提出要幫橡筋褲助選，認為新同盟都算係新政黨，未經歷過以上情況，呢啲政治倫理問題要交由執委會開會決定。佢認為，喺比例代表制下，兩個人未必會對立，泛民主派只要配票成功，有機會兩人同時當選。
新同盟恐被搞散
正所謂「一山不能藏二虎」，一早已經有地區人士建議橡筋褲轉戰港島區，一來佢係南區區議會海怡半島出身，加上白鴿黨單仲偕或會棄選，橡筋褲與同區乳鴿比較，被睇高一線。不過，橡筋褲似乎不為所動，相信無人可以阻止呢場兄弟相爭嘅好戲上演，更甚係搞散新同盟。