被稱為「雨傘運動」的佔領行動過後，出現唔少打算瞄準今年十一月區議會選舉同明年立法會選舉出戰嘅「傘兵」組織，威脅傳統泛民。近日多個「傘兵」組織就收到自稱Anthony Cheng嘅男子聯絡佢哋，開出條件話樂意資助傘兵參選區議會，但就必須喺指定選區參選，部分更係傳統泛民具優勢嘅選區。成件事唔止有賄選票之嫌，仲觸發埋傘兵組織內訌，背後仲可能係傳統泛民同「傘兵」組織之間嘅角力。
佔領運動後已退出新民主同盟嘅劉頴匡尋日喺社交網站話，原本多個收到Anthony Cheng聯絡嘅傘兵組織經商討後決定同電視台記者「放蛇」，搵出幕後財團身份，有關行動仲安排緊，但其中一個傘兵組織「青年新政」就喺社交網站上事先張揚消息，令調查曝光。劉頴匡直斥青年新政「光環搶到是很威了，但計劃功敗垂成」，直言感到遺憾同失望。而青年新政就懶理劉頴匡批評，尋日仲去埋廉政公署備案。
至於事件中呢位Anthony Cheng原來係網台主持人，中文名為鄭永建，同傳統泛民關係密切。佢尋日接受傳媒訪問時就話只係想測試傘兵組織對收錢嘅反應。咩葫蘆賣咩藥真係佢先知，如果班傘兵組織真係肯收錢，咁網台下一步又點做呢？不過，雖然今次所謂嘅「測試」未成功，但已令傘兵團體互相指摘及爆發內訌，相信傳統泛民一定係最大得益者。
卓妮