中環出更：「禮」籲與時與時並進
科技發展日新月異，若唔跟上腳步好易落伍。好似被投資推廣署列作外商在港投資「成功個案」嘅手機召車服務Uber，早前被警方高調執法並拘捕多人，事件中政府擺明係自打耳光。投資推廣署助理署長蔣學禮尋日出席「台灣農漁會百大精品及標章產品展售會」時，卓妮趁機問佢今次烏龍事件，佢認同科技發展好快，日後或再有類似個案發生，所以有關決策局應作跨部門檢討，與時並進。
其實，有唔少外來投資者都頗受市民歡迎。蔣學禮笑笑口話，就好似來自台灣嘅知名鳳梨酥品牌及西式咖啡茶室等，佢都有份促成來港開店。
蔣學禮仲話，現時台灣食品已經係香港第二大進口來源地，台灣農漁產品質素好、種類多，所以希望未來多啲鼓勵台灣企業來港發展業務。
台北貿易中心主任孫至誠就話，近年台灣致力協助農漁產品擺脫「土產」形象，透過一系列安全認證及包裝，將產品進一步提升為精美禮品，每年亦會選出百大精品並重點促銷。
台「總統梨」推介港人
好似今次特別推介嘅「總統梨」，係用特製儀器測定水梨嘅甜度及熟度，達標者先至有此稱號喎！講到咁正，唔怪得香港台灣婦女協會會長林華琴及保良局前主席陳亨利太太陳趙滿菊都趁機去掃貨，仲滿載而歸添！
卓妮