寄信要貼足郵票，呢個道理三歲細路仔都知，偏偏政府部門其身不正，居然連郵資都畀唔足，簡直匪夷所思。
件事係咁嘅，香港郵政近日加強抽查郵資不足嘅郵件，結果揭發房屋署向公屋準住戶發出嘅「入伙通知書」，因為郵資不足而延誤派遞。有市民反映，最近收到香港郵政嘅欠資通知，急急去郵局了解情況，先至知道問題出喺房署發出嘅入伙通知書，部分信封僅貼上面值一元嘅郵票，旁邊有香港郵政嘅欠資標籤，顯示有關信件尚欠三元四角。
房署又點解釋呢？佢哋話喎，主要係外判物業管理公司出錯，已經責成對方妥善跟進；又話入伙通知書一般會喺正式辦理入伙手續兩星期前向準住戶發出，相信因郵寄問題而延誤入伙嘅機會唔大喎。
咁都得？今時今日輪候公屋大排長龍，申請者日望夜望，等到頸都長，幾經辛苦至輪到上樓，點知入伙通知書居然延誤，仲有冇再離譜啲吖。正如有人話齋，「等一日都嫌多」，延誤派遞入伙通知書，隨時錯過報到時間，畀房署當放棄單位，分分鐘要再等幾個月至可以上樓。仲有吖，萬一有人收到郵局嘅欠資通知，冇及時跟進，咁就大件事喇。所以話，房署敷衍塞責，連寄信都要假手於人，簡直累人累物。
唔怪得喺政府部門投訴排行榜中，房署年年上榜，而且穩坐三甲位置喇。如果話寄信郵資不足係小事，咁鉛水風波係大件事嘞啩，鉛水搞到滿城風雨，人心惶惶，房署除咗監管甩漏，刻意隱瞞，而且到依家仲未查清鉛禍何來，房署官僚，渾渾噩噩，證明「投訴王」呢個稱號並非浪得虛名。
當然喇，同房署相比，香港郵政亦唔好得幾多。房署寄信畀唔足郵資，香港郵政依足程序追討，冇人話唔啱，但正如前線員工踢爆，香港郵政處理欠資郵件，一般會先貼上「欠資郵票」補回差額，再向收件人追數，弊就弊在欠資郵件不斷增加，由每日五百件激增至約一千九百件，搞到「欠資郵票」唔夠用，部分郵局居然任由大批郵件積壓。試諗吓，如果有公屋申請人因為郵件積壓而錯過入伙通知書，你話點算呢？其實，「欠資郵票」用晒，可以用標籤或收據代替啫，香港郵政咁都懶得做，何止係唔識變通，直頭係官僚主義喇。
正所謂，見微知著，郵資不足雖然係一件小事，但已足以反映港產官僚做嘢求求其其，敷衍了事，完全冇為市民利益着想。講到底，近年港府民望低落，施政受阻，都係自己造成嘅咋！