政情：施榮忻細數內地交流團演變

十年前需自費食宿

Jaime話，佢自己九六年回歸前第一次參加考察團去北京，當時所有食住使費都要自己「科水」。十年後再獲邀赴京參加交流團，待遇已經好咗好多，可以住喺國家行政學院宿舍。到依家更加有港澳台交流中心，專責接待兩岸三地嘅到訪同胞，真係愈做愈好。

除咗硬件待遇大幅提升外，交流團嘅討論內容亦愈嚟愈開放。

佢記得，當年軍事、政治呢啲敏感議題都係討論禁區，但國家經歷咗咁多事，逐漸學會接納不同意見，所以近年去到內地交流，都能有限度咁討論上述敏感議題。

不過，Jaime話多年來兩地交流嘅最大變化，係大部分香港青年嘅普通話水平，都比上一代嘅港青進步咗好多，大家冇咗言語隔閡，關係自然拉近咗。問及上任後有乜大計？佢就話都係希望加強溝通工作，團結兩地有能力嘅青年人，一同服務社會。