政情：區選煲議題 隨時一鑊粥
距離十一月區議會換屆選舉投票日只餘下三個月，建制、泛民政黨於「後政改」時期狂谷地區議題，實行事事選票行先，因此各黨派都各有側重點，其中泛民政黨方面，民主黨除主打食水含鉛超標事件，有區議員金睛火眼多宗樹木被斬事件，而公民黨則重點跟進港大校務委員會押後學術、人事及資源副校長任命風波；建制派最大政黨民建聯於食水含鉛超標事件落後於人嘅情況下，惟有轉而窮追猛打電話騙案，如約見內地有關部門反映意見，不過各大黨派依家就去得盡，不過如果一不小心炒作不成，隨時捉蟲被反咬都有可能！
食水含鉛超標事件於今年七月曝光，其後陸續發現多個公屋以至私樓食水都「中招」，首先踢爆事件嘅白鴿黨對此如拾至寶，其後更擴大戰線，聯同民協、新民主同盟等組成「食水苦主大聯盟」，似乎想一直將此議題延燒至十一月區選，而該黨個別區議員及成員則對地區議題各有關注。
具爭議性 難獲大量支持
舉例指白鴿黨總幹事林卓廷主打樓宇維修圍標，中西區區議員許智峯亦咬緊半山般咸道四棵石牆樹被斬事件；由黨魁梁家傑領導嘅公民黨則同教育界議員葉建源對準港大副校長任命風波，看來一日副校長任命未有明確取態都唔會放手，不過基於以上多個議題都具爭議性，而且較複雜，支持反對意見都有，因此未必會好似鉛水危機咁短時間內就取得選民嘅支持及認同。
泛民成立「心戰室」鬥建制
有泛民中人事先張揚，手上有數個個案隨時可以「炒熱」，暗示於選舉前隨時可以斬多幾両，據聞泛民於成立十八區飯盒會嘅基礎上，打算成立專門嘅「心戰室」，分析並考慮選舉策略，包括製作地區施政願景政綱，似乎想同建制派長期作戰。
不過話雖如此，建制派都唔係省油嘅燈，特別係擁有逾百名區議員嘅民建聯，近日先係跟進地區衞生清潔等議題，最新議題由立法會議員陳恒鑌領軍跟進，涉及中港關注嘅電話騙案，希望在此殺出一條血路；工聯會方面則主要默默做好地區工作，好似搞無障礙通道、開居民大會講解公屋重建及綠置居等議題。
有建制派中人分析，區議會選舉係小選區選舉，勝負關鍵可能係候選人跟進當區選民關注嘅議題力度，多於關乎全港性嘅食水含鉛超標、電話騙案等議題，所以各大政黨狂谷議題嘅同時，如果忽略細微細眼嘅民生無小事課題，分分鐘會得不償失都唔定！