中環出更：「飯碗舞」蕭思江 再度參選
○七年參加香港島立法會補選，以跳「飯碗舞」一鳴驚人的蕭思江重出江湖，尋日搶閘宣布參選十一月灣仔區議會樂活選區。佢解釋，自己居住於樂活選區，一直關心區內巴士改組及路線問題，批評前任及現任樂活選區區議員於任期內，對於巴士改組問題「唔覺得做過任何嘢」，相反自己多次就此去信巴士公司跟進事件。
蕭思江透露，原本打算向法庭申請命令，要求巴士公司把代替巴士路線的終點站，與過往的巴士路線睇齊，但他最近決定參選灣仔區議會樂活選區，為免令選舉經費超支，因此暫緩有關法庭程序，他有信心可以取得足夠提名報名正式參選。據了解，曾於樂活選區勝出嘅社民連麥國風有意捲土重來，預料到時有一場惡鬥。
怕「被辱」唔玩新東補選
當問及會否參選明年初立法會新界東地方直選補選，身為港人民權民生黨主席的蕭思江表明無意參選，原因之一係兩大陣營已「拎晒啲票」，費事參選「被侮辱」喎。
卓妮