中環出更：鋼琴好手共譜街頭妙韻
玩音樂唔一定要喺正式演奏廳，只要樂器在手，熙來攘往嘅街頭都可成為氣氛十足嘅舞台。PMQ元創方近日將著名英國藝術家Luke Jerram發起嘅國際著名街頭鋼琴藝術活動引入香港，喺多個地點如街市、公園及圍村等擺放鋼琴，供途人任彈。卓妮尋日喺開幕活動上見到「海港城鋼琴王子」陳雋騫（Phoebus），原來佢同現場兩位鋼琴家李偉安（Warren）及施敏倫（Amy）係聖保羅男女中學及附屬小學嘅同學仔，自細就合作無間。
尋日十六位來自不同界別的本地鋼琴好手，難得匯聚一堂喺PMQ表演「十六重奏」，為活動揭開序幕。Phoebus笑言，當年小學喺歌詠團負責彈琴，點知彈唔掂，要急召師兄Warren返去幫手。當年佢哋喺歌詠團練歌練到悶，仲搵埋Amy一齊jam歌，相當有默契。
鍾情古典 鄧達智擁逾千唱片
有份設計呢啲鋼琴嘅著名時裝設計師鄧達智及住好啲創辦人楊志超，尋日亦有出席。鄧達智話，音樂對時裝影響好大，佢個人特別鍾情古典作曲家拉赫曼尼諾夫及布拉姆斯，屋企更收藏逾千隻CD及DVD。佢又話，曾有同事送咗隻CD畀佢，佢覺得好好聽，於是由下午三點一直喺公司重複又重複，聽到夜晚十一點幾先至肯走。
同場表演嘅仲有鋼琴家李嘉齡、李明哲、大律師公會主席譚允芝、西九管理局行政總裁辦公室總監黃寶兒、以及中策組特別顧問高靜芝嘅女兒盧宜均等。經常於正式場合表演嘅李嘉齡，原來係首次喺街頭彈琴，感覺別有一番風味。
黃寶兒則透露，父母當年覺得音樂搵唔到食，所以做咗其他行業，不過唔做音樂家一樣可以維持呢個興趣。而女兒及兒子分別拉小提琴及大提琴的譚允芝，就不時同家人及朋友在家合奏，充當假日消遣好節目。
卓妮