國之將亡，必有妖孽，睇吓香港就知道古人講得冇錯。回歸十八年來烏煙瘴氣，七國咁亂，咪就係因為妖孽為患囉，尤其係舊年嘅佔領之亂，更係群魔亂舞，醜態百出。最奇怪嘅係，佔領鬧劇已經結束咁耐，幕後黑手仍然逍遙法外，連調查黑金醜聞亦無聲無息，簡直匪夷所思。
講到佔領之亂，就唔能夠唔提人稱淫賤黎嘅壹淫媒前主席黎智英，佢唔止係幕後黑手，而且係最大金主。東方報業集團去年七月先後取得多批密件，揭發淫賤黎過去幾年向唔同泛民團體及個人秘密捐款合共逾四千萬元，而且全部經過一位曾從事美國海軍情報工作嘅洋人之手，引起社會嘩然。多個團體及市民先後向廉政公署及立法會舉報，要求徹查事件，之後廉署人員分別突擊搜查淫賤黎及洋助手等人嘅寓所，檢走電腦及文件等證物，而多名泛民政客包括李卓人、何秀蘭、張超雄及張國柱等，亦先後多次現身廉署總部助查，點知查咗逾年，依家仲係毫無進展，更無任何人被落案起訴，你話奇唔奇吖。
係人都知，淫賤黎唔會無緣無故送錢畀泛民，佢同美國關係千絲萬縷，除咗助手係美國人，而且多次被踢爆與美方人物秘密會面，如果話當中冇蠱惑，細路仔都唔信喇。至於黑金醜聞嘅另一主角、工黨主席兼立法會議員李卓人，更被揭發通過職工盟向美國國家民主基金會旗下組織索取大筆捐款添。正如有學者及立法會議員質疑，黑金醜聞明顯同外國勢力有關，喺證據確鑿嘅情況下，廉署查來查去都無結果，究竟係咩原因呢？唔通因為案件涉及外國勢力而縮手縮腳？
正所謂，治國無法則亂。好多國家及地區早就禁止從政者接受外國政治捐款，唯獨香港由於二十三條遲遲未能立法，牛鬼蛇神有恃無恐，咪搞到烏煙瘴氣囉。其實，就算二十三條未立法，立法會議員接受淫賤黎秘密捐款而冇申報，本身已經違反指引，傳媒盡咗第四權嘅責任，將黑金醜聞暴露於光天化日之下，當局咁都仲唔做嘢，唔係包庇又係乜吖？當年美國傳媒踢爆「水門事件」，連總統都要鞠躬落台，充分顯示第四權嘅威力，反觀港府處理黑金案拖泥帶水，唔止漠視傳媒監督，而且當市民冇到，豈有此理！
所以話，香港回歸咁耐亂足咁耐，唔係冇理由，港府有法不依，包庇妖孽，唔亂至奇喇。好似處理佔領鬧劇咁吖，呢頭將搞手及黑手一網成擒，嗰頭又放虎歸山，搞到管治危機四伏，風雨飄搖，呢啲咪就係唔衰攞嚟衰囉！