你的環保意識如何，你的源頭減廢成效也必如何！老朽睇完本報「探射燈」報道，指港產官僚將原本係寶嘅園林廢物當垃圾——日丟一百五十四噸而忽然有的感悟！
本報記者一針見血指政府嘥料，一味高叫「垃圾圍城」，環境局局長黃錦星早前在立法會陳情，懇請議員通過「三堆一爐」時，指香港整整二十年，在處理廢物的環境基建，並沒有做過任何的補充或新建相關具有容量嘅設施，香港廢物嘅末端處理，如何迫在眉睫云云，講真，黃錦星又為環保做過乜嘢？
至叻也不過是「全面推行塑膠購物袋收費」咁大把！若然再有新猷，頂多就係所謂「垃圾徵費」，嗱！港產官僚做嘢有兩大特徵，係乜？
第一招：一味向錢看！第二招：拖得就拖！香港搞環保，何以搞來搞去得個「吉」，淨係睇一篇本報踢爆環境局及發展局先後公布園林廢物嘅減廢藍圖和指引就知，政府一味「鼓勵」各個部門循源頭減廢、重用及循環，可惜，講一套做一套，致使有關計劃淪為口號，事隔一年，政府部門仍未制訂前線的實務守則，前線人員不斷將園林廢物往堆填區送！
有業界願把園林廢物再造，可惜政府又闊佬懶理，沒有提供任何協助；講來講去，官僚向來做事冇承擔，鍾意取易捨難，情願見步行步，遇到棘手難題，就會使出如來神掌第九式，萬佛朝宗，一字記之曰：拖！
官僚每遇政策難題解決唔到，就會諮詢再諮詢，研究再研究；好像全民退保、電子道路收費、更新空氣質素指標……總之一味在拖，在蹉跎歲月；處理園林廢物、廚餘亦都係得把口！黃錦星局長只為自己一家四口交一百二十蚊電費而驕傲，「你的環保意識如何，你的源頭減廢成效也必如何」！香港環保失救！只黃錦星一人得道有得救！