政情：港大後輩搞衝擊 肥亨痛心
港大學生衝擊校委會會議及禁錮校委事件，連日來不斷有舊生聯署批評，尋日又多位舊生發聲，佢就係前高官、候任港鐵主席馬時亨（肥亨）。肥亨參與一個慈善攝影展分享時話，對港大學生嘅衝擊行為感到傷心，直指學生唔識尊重，影響港大校譽和形象，認為即使持有不同意見都要互相包容。
倡設紀律委員會調查
肥亨認同學生見到唔公平嘅事絕對要發聲，但可以考慮校園靜坐呢類溫和手法，而非以衝擊呢種暴力手法發聲，咁係唔尊重他人、唔尊重制度嘅表現。佢又主張成立紀律委員會調查事件，作為懲罰學生嘅準則，因為畀時間學校調查，係一個對學生公平，又能夠尊重學生同制度嘅體現。
佢又話，除咗港大校園，其實香港社會都好撕裂，有權力嘅人同普羅大眾都應該尊重制度，政府官員、立法會議員等更應該帶頭做起，畀市民大眾一個榜樣，發揮香港人過往嗰份尊重、互諒嘅精神。至於將來接任港鐵主席後，怕唔怕喺公開場合或立法會上唔受尊重？肥亨就話一向都有心理準備，又習慣承受壓力，希望大家能夠互相尊重啦。