立法會議員一向可以選擇用手提電話短訊功能或傳呼機接收秘書處發出嘅緊急訊息。雖然傳呼機漸被淘汰，大部份功能被手提電話取代已久，但竟然仲有三十多位議員用緊傳呼機接收秘書處訊息！秘書處尋日就發問卷諮詢全體議員有關取消傳呼服務嘅建議，鼓勵議員改以電話短訊接收緊急訊息。不過，有建制派議員就怕取消傳呼服務後會出現「甩轆」情況。其實如果要出事的話，用WhatsApp都會「甩轆」，例如群組內容外洩，所以講到底都是個人問題。
秘書處指議員攜帶多一個通訊設備實屬不便，傳呼機關上時不能接收訊息，啟動後訊息也無法尋回。因此秘書處鼓勵仍使用傳呼機的議員考慮改用電話短訊功能。若所有使用傳呼機的議員同意，便會安排回收有關傳呼機，傳呼機服務或會由下屆立法會會期開始取消。
金融界議員吳亮星（星爺）都有用傳呼機，但話平時部機放在辦公室，有新資訊由助理經WhatsApp轉發畀佢，佢認為取消傳呼機慳錢又環保。不過用咗傳呼機十幾年嘅王國興就話，每當開會法定人數不足，都係靠傳呼機通知趕返會議廳，如果取消要一段時間先適應到。