政情：兩新科局長 係冇殼蝸牛
政府尋日上載新一年政治委任官員及行政會議成員利益申報，對比去年嘅公布時間足足遲咗一個月，唔知同兩名新獲委任局長有冇關呢？兩名新科局長嘅利益申報，民政事務局局長劉江華及公務員事務局局長張雲正，都申報冇持有物業、公司股份或擔任受薪董事。劉江華一向都係租樓，但連張雲正都做「冇殼蝸牛」，唔通佢哋都睇淡香港樓市，加入「淡淡」行列，諗住「租樓日日賺」？
至於其他申報資料，劉江華就留任民建聯贊助會員、由他創立嘅公民力量會員、香港賽馬會會員等六十七個組織。而佢太太穆斐文、即係廉政公署前社區關係處處長，依家就報稱「退休前休假」。另一新科局長張雲正，除咗以官方委員身份擔任基本法推廣督導委員會成員外，就只係賽馬會全費會員。不過，最新鮮嘅發現，莫過於張雲正仍然係單身，官場又多個「鑽石王老五」。
李國章蟬聯行會「樓王」
至於其他行會成員，李國章就蟬聯樓王，佢喺香港及英國倫敦，以公司名義持有三十二個物業、八個車位，同去年申報一樣。就算每個物業住一晚，都要成個月先住得完！此外，商界議員林健鋒亦在香港持有十三個物業、十五個車位，另有一幢十二層嘅工廈；同時又喺佛山、連州擁有工廠廠房，以及喺佛山及連州擁有六幅土地。
問責官員之中，依然由勞工及福利局局長張建宗坐穩「樓王」地位，佢申報香港有九個物業、一個車位，八個均由妻子擁有，一個作家庭成員居住、其餘作出租用途。佢其中一個位於東區嘅單位，就改由家庭成員居住，原本中西區嘅單位就變成出租。商務及經濟發展局局長蘇錦樑都係「樓市大好友」，上月九日就簽咗臨時買賣合約，買一個中西區單位，仲講明係投資添！
林鄭續減持海外物業
不過，政務司司長林鄭月娥今年就陸續減持海外物業，最新申報已經冇咗英國劍橋及劍橋郡、以及蘇州嘅物業，只餘下由丈夫擁有、喺廣東中山一個自用單位及車位，睇嚟佢真係打算喺香港退休喎。至於教育局局長吳克儉上任時申報持有一間人力資本管理顧問公司，但一直都未取消到，今次就申報喺今年六月撤銷公司註冊申請，獲公司註冊處批准。