中環出更：白鴿內鬥 封殺新界東乳鴿
區議會選舉將至，唔同政黨都積極備戰，但預計派出近百人參選嘅民主黨（白鴿黨）竟然因為人選問題而爆出派系鬥爭。該黨新界東支部兩次以高票否決推薦「80後」沙田區議員麥潤培出選，尋日該黨中委會原定開會覆核申請，但有傳新界東部分議員擔心中委會推翻支部決定，支持麥潤培參選，竟然以退黨威脅，搞到中委決定押後處理覆核申請。
其實麥潤培同新界東支部唔咬弦都係公開嘅秘密，有傳佢多次得罪班「前綫系」嘅黨員，好似公然在社交網站話自己黨友唔靚女，又唔尊重前輩，搞到前綫派趁機封殺佢。
「前綫系」退黨脅中委
估唔到嘅係，部分中委會委員竟然一面倒撐麥潤培，覺得唔畀一個原區議員再出選好難同公眾交代，搞到前綫系黨員不惜以退黨威脅中委。兩個派系爭持之下，黨內一啲面面俱圓嘅老大哥就建議不如押後處理，畀多啲時間討論，甚至有人話不如拖到選完先處理添！
雖然麥潤培早幾日就自稱無犯任何黨規，所以都唔怕中委會唔支持，但聽聞佢已經搵定後路，包括加入公民黨新界東支部，諗住有機會上位選立法會，就算最終過唔到檔，佢亦計劃以青靜動力主席名義參選，睇嚟有晒周詳計劃。
卓妮