中環出更：人仔貶值 商界有喜有愁
人民幣突然大幅貶值震驚全球，尋日卓妮喺一個活動上見到唔少商界人士，講起人仔貶值嘅影響，有人歡喜有人愁。協成行董事總經理方文雄（David）及做藥品生意嘅中華總商會青委主席黃楚恒呻話，人仔貶值令資產縮咗水及成本上升。做印刷包裝生意嘅華彩集團主席史立德（Allen）及中總會董張俊勇（Thomas）反而開心晒，Thomas直言，人仔連續三日貶值令佢慳番約百分之五成本喎！
David嘅生意以地產及投資為主，佢話十幾年前買落嘅人仔存款縮咗水，集團喺內地嘅投資同樣貶值，所以係受害者。不過，諗深一層，David十幾年前已識得買人仔，咁多年來人仔累計升值近四成，根本冇得輸。黃楚恒同樣對人仔貶值感到肉赤，事關佢哋內地廠房資產係以人民幣計算，內銷市場賺取亦是人仔，人仔貶值，變相資產都貶值。不過，佢好睇得開，話匯率短期波動好正常，唔使擔心喎。
張俊勇投資內地慳成本
Allen盤生意就係用美元找數，所以人仔貶值對佢有利。Thomas就喺內地搞緊投資項目，咁啱匯款前人仔接連貶值三日，令佢慳番約百分之五成本。香港總商會行政總裁袁莎妮（Shirley）都有到場，佢啱啱外遊返港，難怪咁容光煥發。Shirley同父母乘坐郵輪到日本沖繩玩足七日，期間唔使左騰右騰，歎住休息，叉足電，就梗係精神晒啦！
卓妮