政情：建制大報復 盡搶各小組
今屆立法會即將去到最後一個立法年度，泛民主派同建制派之間嘅矛盾白熱化。大家應該記得上個立法年度，泛民玩「突襲」佔領財務委員會轄下嘅工務小組及人事編制小組兩個委員會，搞到政府涉及工程及加開首長級職位撥款時困難重重，其次又好似審犯咁玩殘申請後補加入小組嘅建制派議員。所謂「有仇不報非君子」，有建制派議員講到明，嚟緊一年必定空群而出加入各個小組委員會，誓要全奪主導權。
或全面攻佔正副主席位
話說以往泛民同建制派，就各個小組委員會正副主席人選都會有不成文協議，佔優嘅建制派點都會讓番啲位畀泛民。不過，自從去年佔領行動後，泛民不但在議會展開不合作運動，還指摘建制派留番啲唔重要嘅「豬頭骨」正副主席位畀佢哋，所以才玩「突襲」。有建制派人士認為，既然泛民破壞協議，「你做初一、我做十五」，佢哋會空群而出加入各小組委員會，意味每個委員會最少會有廿八名建制派議員，確保人數一定多過泛民。
至於建制派係咪會搶盡全部委員會嘅正副主席，據聞佢哋都有唔同睇法，強硬派就話一不做二不休，好似內務委員會副主席之位，如果泛民強行推薦衞生服務界李國麟以外嘅人選，建制派就會派陳克勤搶埋呢個副主席位，甚至不惜破壞之前協議，搶埋可能由工黨何秀蘭及李卓人分別執掌嘅教育事務委員會同公務員及資助機構員工事務委員會主席之位。
自由黨未必跟隊恐「甩轆」
不過，建制派內嘅溫和派就覺得唔應該咁盡，一旦反晒面，泛民可能喺唔同場合玩嘢，搞到建制派雞毛鴨血，到時「殺敵一千、自損八百」，兩敗俱傷都無謂。加上自由黨未必同主流建制派路線一樣，唔係全部人都咁團結，到時再出現類似「等埋發叔」嘅事件，建制派無能形象就真係漂白水都漂唔甩喇！不過，建制派上年度受盡泛民嘅氣，相信最後未必咁仁慈，預料同泛民反枱收場。