有人話，醫管局冇嘢叻，最叻就係做騷補鑊。睇嚟真係冇講錯，近年公立醫院七國咁亂，醫療事故層出不窮，醫管局次次都煞有介事調查一番，然後發表一份報告，提出幾項建議。好似瑪麗醫院早前發生霉菌奪命事故咁吖，醫管局例牌又係呢套動作，成立專家小組調查咗兩個星期，話就話已經有結果，但可唔可以亡羊補牢，防止類似事故再次發生，實在令人懷疑。
事緣瑪麗醫院上月爆發霉菌危機，六個病人受到感染，其中兩人死亡，兩人依家仲未出院。事後院方喺病人嘅衣服、床單驗出霉菌，懷疑問題出自深灣洗衣場。醫管局專家小組調查後證實，深灣洗衣場環境衞生惡劣，每一百平方厘米有一千至一千五百粒細菌，比歐美標準多出數十倍，一百一十九個環境樣本中超過六成含有霉菌，而清洗衣物嘅水溫只有攝氏六十幾度，未能達到殺菌嘅效果，最離譜係已洗淨嘅被服包裝時仍未乾透，而且同未清洗嘅被服存放距離太近，而漿衣粉又放喺垃圾桶附近，簡直係一塌糊塗。
根據調查報告嘅講法，深灣洗衣場只可以用藏污納垢形容，點可能唔出事吖。正所謂，佢不殺伯仁，伯仁因佢而死。雖然深灣洗衣場由外判商負責營運，但醫管局負有監管之責，結果搞成咁，一樣難辭其咎嘅咋。嗱，依家調查已有結果，究竟點樣補鑊？又點樣追究責任呢？報告建議採取歐美標準，即係一百平方厘米唔可以多過二十粒細菌，要定期消毒，醫護人員要抱着高度懷疑態度喎。阿媽係女人，講咗等於冇講。
話時話，瑪麗醫院已經唔係第一次爆發類似危機，○九年該院多名病人感染霉菌死亡，經多重追蹤及化驗至發現，病人服用受霉菌污染嘅痛風藥「別嘌醇」出事。如果話前車之覆係後車之鑑，咁瑪麗醫院既然曾發生過類似事件，理應提高警覺至係，點解咁快又重蹈覆轍呢？答案就係：院方根本冇吸取教訓。
所以話，醫管局管理混亂，先至係公立醫院亂象叢生、頻頻出事嘅主要原因。當局要求洗衣場改善衞生，全面消毒，固然係應有之義，但如果醫管局唔能夠改善本身嘅管理，提高公立醫院服務水平，就算今次事件平息，可能好快又出事嘅咋。
講起真係令人唏噓，以前公立醫院服務備受稱讚，令港人引以為傲，點知今日竟然淪落成咁，病人輪候時間長不特止，而且事故頻頻，令人提心吊膽。一葉知秋，公立醫院服務水準每況愈下，正正係成個香港不斷沉淪嘅縮影！