港府昨日宣布委任資深傳媒人梁家榮做新任廣播處長，今日履新，但原廣播處長、本身係政務官嘅鄧忍光，就冇同時公布去向。早前港府宣布將兩名問責局長「炒魷」，並委任原海關關長張雲正升任公務員事務局局長時，官場盛傳會由鄧忍光接掌海關。而由於海關關長屬於《基本法》訂明嘅主要官員之一，須由中央政府任命，因此日前特首梁振英提早結束休假返港，有人就猜測係咪為咗處理關長嘅委任事宜。但依家廣播處長任命公布咗，關長任命就唔見影，搞到鄧忍光吊吊揈，唔通有關任命甩咗轆？