政情：菲印公幹 卿姐豪使10萬
早前有立法會議員亂用津貼狂掃IT潮物或支付佔中助理薪酬等，被批評濫用公帑。立法會議員劉慧卿（卿姐）近日與助理前往菲律賓，同當地政府官員傾外傭中介公司濫收費用嘅問題，短短四日已使咗四萬蚊，加埋下星期到印尼，預計兩次公幹要使約十萬蚊，不過就全部自費。
同助理各住一間酒店房
卿姐話，使費咁貴主要係用喺交通同租住酒店。其中酒店費要雙計，因為同佢隨行嘅係男助理，佢哋一人一間房，咪搞到咁貴囉！咁佢下星期去印尼時帶嘅係女助理，咪可以慳啲？點知卿姐想助理住得舒服啲，所以都係一人一間房喎！咁使法，難怪菲印兩次行程加埋要使約十萬蚊喇。
講番菲律賓之行，卿姐話，雖然當地禁止中介公司收取任何中介費，但係濫收情況不絕，有啲收取十萬蚊或六個月人工。菲律賓當局過去三年因此取消一百七十六間中介牌照，但問題仍嚴重，佢促請兩地政府加強合作，利用放蛇等方法阻止問題發生。