政情：耍太極 慎飲食 方平見番條腰
香港潮屬社團總會秘書長兼葵青區議會主席方平最近睇落清減咗，尋日我哋見佢着咗件修身嘅西裝，狀態唔錯。傾開先知佢都好貪靚，佢八、九年前已開始耍吳家太極，條腰由最高峰嘅三十八吋，減到依家得三十二吋。方平仲話，佢個太極師傅已九十幾歲添，睇嚟耍太極唔止可以減肥，仲可以長壽。
外出應酬 偷偷離場
除咗耍太極，方平飲食亦好講究。佢以前朝早食粥，依家就改食麥皮，午餐食沙律，夜晚若返屋企食，就會食番薯同一大盤菜。不過實情係夜晚應酬多，一個月得幾晚食到住家飯。外出食飯容易肥，佢都有招數應付，就係唔會食多過三道菜，趁在場人士飲得開心時就偷偷離場啦！雖然呢個方法可以減肥，但係就製造咗好多廚餘，好唔環保囉！