泛民多個政黨包括民主黨、民協、新民主同盟及受影響屋邨嘅地區人士，早前組成「食水苦主大聯盟」，但未見公民黨（公文袋）有代表加入。加上公文袋最近兩次關於鉛水危機嘅記者會，都係唱「獨腳戲」，令到公文袋懷疑被飛起，未獲邀加入大聯盟嘅傳聞甚囂塵上。
公文袋黨魁梁家傑（袋巾傑）話，佢哋個黨負責嘅地區中，冇食水含鉛超標嘅苦主，又聲稱大聯盟記者會嗰日，亦有派人到台下聲援，日後會繼續與大聯盟聯絡喎！大家千祈咪誤會，以為公文袋區議員服務嘅地區咁好彩，查實係佢哋有議席嘅地區極少囉！
對於政府仍未公布獨立調查委員會嘅組成人選，袋巾傑聲稱想再運用立法會特權法調查事件，現正尋求泛民嘅支持，要求立法會主席曾鈺成喺今個月舉行特別大會，促請政府向市民交代進度。佢已經喺泛民個WhatsApp群組度發出訊息，但係仍未有泛民回覆。咁有幾多個泛民「已讀不回」？點知佢唔識睇邊個睇咗訊息喎！
話時話，公文袋既冇接獲苦主求助，泛民對係咪召開特別大會嘅反應又咁冷淡，莫非係唔想公民黨加入「抽水」行列？