政情：國泰坐地起價 發閱兵財

CEO出席活動 四人擋傳媒

國泰接二連三被揭醜聞，適逢尋日國泰舉行員工嘉許禮，並由行政總裁朱國樑擔任頒獎嘉賓，唔少傳媒機構特意嚟到採訪，諗住追問佢有關機位超賣、機艙食水受污染及機場三跑建設費等。過去舉行類似活動，國泰都會安排傳媒訪問，但尋日活動開始前，公關已經話朱國樑唔會接受訪問。當活動結束後，朱國樑曾經停留喺台上同員工合照，但之後就經台下嘅後門通道離場，對傳媒嘅問題充耳不聞，身邊仲有四至五名工作人員掩護，使唔使咁驚青呀？

代表團機位票價升近倍

另外，九月三日係抗戰勝利七十周年，北京將會舉行大型紀念活動，包括閱兵儀式，邀請咗約三百名香港政商要人參與。點知國泰疑似坐地起價，將原本只需三千幾蚊嘅來回機票，暴升至須七千元。

事緣代表團強烈建議團員乘搭由國泰包攬嘅指定航班，往北京嘅航班有兩班，分別係九月二日下午兩點同下午五點；但返香港就只有一班機，即係九月四日上午十點嘅航班。由於大會將安排專車將乘坐指定航班嘅團員送往酒店，唔搭指定航班嘅人就要自行往返。

換轉係平日，自行由機場往返酒店當然冇問題，但喺紀念活動同閱兵儀式舉行期間，北京市將會實施嚴格交通管制，想自己搵車都幾難，因此大部分團友都被迫乘坐有關指定航班，以免出現阻滯。唔知國泰係咪專登睇準呢個時機，將機票大幅加價。有買咗機票嘅團友投訴指定航班以外嘅機票平均都係三千幾元，只有指定航班貴差唔多一倍，直斥國泰做法離譜，國泰回覆我哋查詢時就話機票價格一向按市場需求而變動喎。