中環出更：哪吒製「巴士」惹抄襲疑雲
選舉臨近，政界又再爆抄襲疑雲。繼早前民主黨嘅「搏盡」口號被指抄襲元朗足球會宣傳品後，西貢區議員方國珊（哪吒）嘅巴士摺紙模型宣傳品就被指係抄襲一個巴士迷論壇上嘅網民創作。同哪吒屢次交手嘅西貢區議員兼立法會議員范國威（Gary）尋日喺社交網站踢爆，指哪吒嘅巴士係偷圖兼抄橋。哪吒就堅持係二次創作，反斥之前派過小巴摺紙模型嘅Gary係「賊喊捉賊」。
Gary尋日上載哪吒巴士摺紙模型宣傳品，並質疑佢抄襲，佢仲話自己之前都搵專人設計紙小巴模型，開頭以為哪吒係「學得快」同識得「靈活變通」，估唔到原來係偷網民嘅圖，覺得佢應該要尊重設計行業咁話。
回應反擊：二次創作
哪吒回應稱，佢係喺某巴士公司嘅巴士原型上進行二次創作，目的係宣傳佢爭取南將軍澳要有通宵機場巴士嘅訴求，所以特意跟足巴士嘅外貌，但亦加咗好多元素。哪吒又話佢嘅摺紙模型係「一件頭」，而網民創作嘅係要將四張紙合埋先可以摺成巴士。就算話佢抄襲都係抄巴士公司喎！
卓妮