中環出更：秉承家訓 霍震霆兩歲孫習泳
大戶之家，總有家訓。記得已故全國政協副主席霍英東長孫霍啟剛講過，爺爺日日督促佢游水。尋日啟剛父親兼港協暨奧委會會長霍震霆出席一個活動時，自爆佢嘅寶貝孫仔中曦遺傳咗佢媽媽郭晶晶嘅游水天分，已開始踢吓水。仲話中曦好黐佢，前排就忙住幫個孫搵好學校，嚟緊就要開學喇，自己都有啲戥孫仔緊張喎！
慈祥爺爺大讚有天分
霍震霆講起個孫就一副慈祥爺爺咁款。佢話，啱啱同寶貝孫仔喺吉隆坡返港，事關佢去投票支持北京申辦冬奧及冬殘奧會。霍家一向支持運動，霍震霆自細就勤練游水，啟剛亦係，依家個孫未夠兩歲都開始習泳，難怪霍震霆好自豪，話覺得中曦都有啲運動天分o架！
中總傳轉立會代表
同場仲有中華總商會副會長袁武。早排發生政改表決「甩轆」事件，建制派議員嘅表現飽受責難，政圈預計明年選舉將會洗牌。袁武就話，未聽聞中總會有新嘅立法會代表，而且選舉係明年嘅事，目前言之尚早。
中總常務會董楊華勇、會董方添輝、中華廠商聯合會名譽會長羅富昌同兒子羅永邦（Ben）都有到場。楊華勇嘅細仔下星期一將入讀幼兒班，佢話早前同太太一齊陪囝囝搵學校，好彩幾順利，冇遇到古靈精怪嘅問題。羅富昌就話，阿Ben雖然已返家族幫手打理生意幾年，但係佢仲未可以退休。佢笑稱，若用馬齡計算，阿Ben只係得三歲，仍然有進步空間喎！
卓妮