古有「孔子聞韶，三月不知肉味」，今有「港人聞加價，擔心冇肉可食」。唔係講笑，活豬批發價升得快過坐火箭，淨係今個月咋，月初至今已經勁升三成，再咁落去，仲邊有人食得起豬肉喎，想唔食齋茹素都唔得喇。
豬肉價加咗幾多？聽住嘞，年初仲賣緊每擔一千二百元，本月初已上升至一千四百元，家陣仲飆到一千七百七十多元，一個月內急升三成，年初至今更累升四成八，問你怕未。香港鮮肉大聯盟係咁講嘅，曾向本港三間活豬代理商查詢批發價急升原因，代理商歸咎於內地來貨量下降，搞到行內出現「搶豬仔」情況，其中一間代理商每日都只係搶到八十隻活豬咁大把，僧多粥少，批發價有乜辦法唔狂升吖。
正所謂，羊毛出自羊身上，豬肉來貨價急升，最終都係轉嫁到消費者身上。業界話喎，目前零售商每斤豬肉嘅成本高達三十八元，無奈之下惟有加價，例如每斤四十四元嘅瘦肉加至四十六元。佢哋要求食衞局做好份工，盡快同內地有關部門協商，令活豬供應回復正常，否則豬肉價係咁加，唔止業界生意難做，市民亦冇啖好食，隨時引發另一波民怨嘅咋。
咁又係呀，港府口口聲聲民生無小事，而食正正係民生之中最重要嘅一環，點可以置之不理。大家都知喇，豬肉係大部分市民不可或缺嘅日常食品，一旦豬肉加價，影響千家萬戶，基層市民受影響最大，唔嬲就假嘞。達官貴人就話食開洋牛扒、羊扒甚至貴價和牛啫，小市民負擔能力有限，如果連豬肉都食唔起，睇怕只有食素一途咯。
話時話，豬肉價格從來唔止係經濟及民生問題，仲係社會及政治問題。所謂碗中有肉，心中滿足，幾年前內地豬價急升，搞到民怨沸騰，中央政府寢食難安，終於要出手平抑豬價。好嘞，雖然內地豬價得以保持平穩，但一法立、一弊生，由於豬價過低，導致豬農收入大減，紛紛轉行，結果又搞到家陣豬源缺乏，仲影響埋香港添。
所以話，一舊豬肉可以折射出中港關係，一啲都冇講錯。試諗吓，衣食住行中，香港有邊一瓣唔需要依靠內地呢？大家飲嘅係東江水，食嘅係內地豬肉，穿嘅衣服大部分「made in China」，最近港鐵仲引入國產列車添。所以話，部分港人成日搞搞震，逢中必反，唔係驅蝗就係光復，真係好幼稚。家陣內地旅客大減，驅蝗團體就話求仁得仁啫，旅遊零售等行業就慘嘞，冇生意做咯喎，最終受害嘅咪又係基層市民！