香港的所謂「好客之都」——早已隨「驅蝗」趕客而蕩然無存矣！而所謂「今時今日咁嘅服務態度」亦理所當然，沒有最差，只有更差；最簡單舉個例子，老朽以前常去某集團經營之酒樓，侍應之少已到了令人難以忍受之地步，等執枱，往往等到花兒也謝了，依然冇人睬你！等斟茶，方圓十里，舉目無「應」，講真，欲上青天找嫦娥姐談心，比搵個侍應同你斟滿壺茶更容易！
香港嘅「好客之都」，相信已經玩完！最近，更發生連串坑人事件：東網早前獨家踢爆銅鑼灣波斯富街有一間藥房，以每支一萬九千八百大元嘅天價賣黑鬼油，女遊客不虞有詐買了兩支被碌卡三萬九千六百大元！兩支黑鬼油正價應不超過四百元，家陣斬人一頸血，四百變四萬，咁搞法，即使民主阿婆遇上這陷阱，睇怕都會即時收番「四萬」咁嘅口而嚇到擘大個口得個窿啦！
「黑鬼油事件」震驚到內地官媒都有報道，又揭發內地遊客常在銅鑼灣區遇上黑店，話有人在該區藥房買一瓶價格不足六十港元嘅嬰兒魚肝油，碌卡後發覺簽帳額高達五千八百大元，阿哥，唔通食咗呢隻魚肝油，真係識飛，游得快過鯊魚？
好事就話成雙啫，點知醜事一單接一單，坑客手法一鑊勁過一鑊，呢，上周五有山東來港的男遊客並非遇到山東綠林大盜被攔途截劫，而係誤入灣仔一間「謀人寺」藥房，買八両仙人果及八両鳳尾草，帳單金額高達六萬零八百元，鳳尾草變野生冬蟲草，睇怕都係香港藥房才有的本事，真係點到你唔服！
香港呢個城市，點解變得咁醜陋，個別商人為何如此貪婪？何以「貨真價實，童叟無欺」都變成初戀——往事只能回味？老朽只能說，禮崩樂壞，從上而下，一切冇晒規矩，香港呢個「好客之都」霎時變成「坑客之城」亦理有固然也！