政情：廠商會搞「青年工作」助創業
廠商會每年最大型活動就係工展會，以往佢哋都會安排部分攤檔畀社企經營，今年就打算有新搞作，準備搞一個青年創業計劃，勝出四隊將會獲得免租擺檔，賺蝕就要自己孭番。
工展會免租擺檔
據知青年創業計劃初步對象係高中、大專及四十歲以下年輕人，佢哋要組隊撰寫銷售計劃，預計十月下旬廠商會青委會會安排創業論壇，搵有創業經驗嘅青委分享，最後會選出四隊，喺工展會最後兩個星期安排兩個攤檔畀佢哋擺檔。
而為咗鼓勵創業，參加者唔可以買貨返嚟賣，一定要原創或自己設計。廠商會會長李秀恒話，頂多只能免租金，如果連營運開支都畀埋，青年人就唔會感受到做生意有風險。
另一方面，廠商會今年暑假首次安排中學生參觀大學及體驗職場生活，唔通佢哋係想打正旗號，幫政府做好啲青年議題？