政情：泛民區選 假盒作真排擠
民主黨、公民黨、工黨同民協等「主流」泛民黨派前日開咗個退修營，商討過去一個立法年度得與失、未來一年與中央及特區政府嘅關係、以及年底區議會選舉同明年立法會選舉嘅選情同協調工作。退修營嘅其中一個結論，就係將不同泛民黨派立法會議員喺每個周五舉行嘅「飯盒會」，延伸至全港十八個區議會。有關做法枱面理由係要團結泛民，發掘地區議題，不過有泛民中人就踢爆，泛民大搞地區飯盒會，其實係為咗方便區分主流泛民同一眾「傘兵」參選人，係搞排擠而非搞團結。
過往一盤散沙嘅泛民主派，喺佔領行動後的確團結咗，包括對準特區政府喺議會內發起連串不合作運動，代表作係成功突襲「冧友」，取得工務小組同人事編制小組委員會嘅控制權，但喺地區嚟講，不同黨派嘅泛民區議員向來較少合作，甚至偶爾會鬼打鬼互相搶票。
唔畀「會員」插自己友
荃灣區嘅泛民區議員同疑似區選參選人，最近聯手針對建制派倡議嘅社區重點項目、西樓角花園工程做咗唔少工夫，佢哋認為有一定成效，引起到社區關注，於是就提出喺十八區都搞番個類似「飯盒會」合作平台。除咗當區嘅現任區議員，各主流黨派有意參加區選嘅社區主任、社區幹事等都可以參與，唯一條件係槍口一致對外向準政府同建制派，唔可以插番自己友，以及要參與主流泛民嘅選區協調。
「傘兵」多與泛民撞區
有泛民中人同我哋講，佔領行動衍生咗大批「傘後組織」，當中好多都有派人參加區選。呢班傘兵把口就話要狙擊建制派，奪取區議會過半議席，但實際上有唔少人都同主流泛民參選人、甚至係現任泛民區議員撞區，當中又以民主黨最受影響，喺中西區、油尖旺同北區都出現呢種情況。
喺單議席單票制嘅選區當中，同一陣營有兩人出選立即會令勝算大減，最後益咗建制派嘅候選人。有泛民更直指傘兵都有真假之分，真嘅就係想推動民主，假嘅就利用人或畀人利用。不過，由於呢班傘兵堅稱自己係真正民主派，又冇講到明要狙擊主流泛民，泛民好難同佢哋公開反面。成立十八區飯盒會，某程度上方便啲泛民支持者分辨到兩班人，唔會咁易投錯票。